کورونا وېروس: هغه ناروغ چې ډاکټران یې حیران کړل او اوس یې پر مغزو څېړنه کېږي

په بریتانیا کې ډاکټران د هغه ۳۱ کلن ناروغ په مغزو اوس څېړنې کوي چې په کورونا وېروس تر اخته کېدو وروسته یې اعصابو سکته وکړه او روغتون کې بستر شو.

عمر ټېلر په نړۍ کې تر ټولو ځوان ناروغ دی چې د کورونا وېروس له کبله د مغزو حملې سره مخامخ شو.

نوموړی د کورونا وېروس، والګي، د وینې خرابېدو او تنفسي ستونزو له کبله شپږ اوونۍ د بریتانیا د کولچسټر ښار په یوه روغتون کې بستر و.

ډاکټران وایي، عموماً هغه ناروغان چې وضعیت یې دومره خراب وي د ژوندي پاتې کېدو شونتیا یې بیخي کمه وي، که او ژوندي هم پاتې شي نو فلج وي او ۲۴ ساعته پالنې ته اړتیا لري.

خو عمر په حیرانوونکې توګه له دې ټولو ناروغیو ښه شو او پر خپلو پښو له روغتونه کور ته ولاړ.

ډاکټران او د عمر کورنۍ د هغه ښه کېدل یوه معجزه بولي.

پخپله عمر وایي، هیله لري چې د ده ناروغي او په اړه یې څېړنې به ډاکټرانو او څېړونکو سره مرسته وکړي چې په راتلونکي کې د نورو کسانو ښه او چټکه درملنه وکړای شي.

ډاکټران وایي، د عمر د قضیې له کبله دوی اوس تر یوه بریده پر دې پوه شوي چې کورونا وېروس پر انساني مغزو څه ډول اغېز کولی شي او کوم زیانونه ور اړولی شي.

د عمر په مغزو کې څه وموندل شول؟