د فرانسې ولسمشر امانویل مکرون د کورونا وېروس پر وړاندې په لګول شويو محدودیتونو کې د پام وړ نرمښت اعلان کړ.
د دې اعلان له مخې سر له نن دوشنبې به په فرانسه کې ټول رسټورانټونه او د څښاک ځایونه پرانېستې وي، همدا راز وګړي یې نورو اروپايي هېوادونو ته هم تللی شی
دی وايي، د فرانسې اوسېدونکي له خپل هغو بوډا خپلوانو سره هم کتلی شي چې کورونا وېروس ورته ستر ګواښ و
ښاغلي مکرون په خپله وینا کې"د کورونا وېروس پر وړاندې د فرانسې لومړۍ بریا اعلان کړه." خو د ده په خبره هره شېبه د دې امکان شته چې دا وېروس بیا فرانسه کې خپور شي
ښاغلي مکرون وویل: "بیا پرانېسته په دې مانا نه ده، چې دا وېروس دې بشپړ له منځه تللی وي او احتیاط دې ونه شي. سږ دوبی د هېڅ بل دوبي په څېر نه دی، موږ باید هر ډول بدلون ته چمتو اوسو او بیا ستنېدو ته یې ځواکمن چمتوالی ولرو."
ښاغلي مکرون دا هم وویل، لویې غونډې دې په ډېراحتیاط وشي، ځکه سترې غونډې د وېروس لیږدونې مهم فرصت برابروي
ښاغلي مکرون زیاته کړه، په یوه اونۍ کې به له لېسو پرته ټول ښوونځي پرانېستل شي
له دې مخکې د فرانسې په یو شمېر ځایونو کې رسټورانټونو او هوټلونو ته د بیا پرانېستې اجازه ورکړل شوې وه
په فرانسه کې تر اوسه پر کوویډ-۱۹ ناروغۍ ۱۹۴ زره تنه اخته دي او شاوخوا ۲۹۴۰۰ تنه ترې مړه شوي دي
https://www.bbc.com/pashto/afghanistan-53046485