څه باندې څلور میلیون افغان کورنیو ته د 'ملي دسترخوان' پروګرام خوراکي مرستې پيل شوې

افغان حکومت وايي، له کورونا وېروس ځپلو سره د مرستې لپاره یې د "ملي دسترخوان" په نوم د خوراکي توکو مرستو یو نوی پروګرام اعلان کړی، چې په دوو پړاوونو کې به یې پربنسټ کابو ۹۰ سلنه افغانان برخمن شي.

د ولسمشرۍ ماڼۍ په وینا، دا پروګرام به په ۳۴ ولایتونو کې عملي کېږي.

د ارګ په وینا دغه مرستې به د ولسي تړون له لارې ویشل کېږي او پر دولت سربېره به یې مدني ټولنې، د دولت پر کړنو د څار بنسټونه او عام ولس نظارت کوي.

افغان حکومت له دې مخکې له هغو افغانانو سره، چې د کورونا وېروس له امله پر کور ناستي له اقتصادي پلوه کمزوري کړي وو، د وچې ډو‌ډۍ مرسته کوي، چې پر ناعادلانه ویش یې نیوکې شوي دي.

ارګ وايي، په لومړي پړاو کې به ۳۴ ولایتونو کې ۱٫۶۷ میلیون کورنیو ته د ۸۸ میلیون ډالرو په ارزښت د خوراکي توکو بستې، چې غوړي، وریجې، لوبیا، اوړه او د لاس مینځلو صابون پکې شامل دي، ووېشل شي.

ولسمشر غني په تېرو خوراکي مرستو کې د بډو په تړاو وویل: "له ځینو ځایونو معلومات راغلي وو چې ولسوالان غواړي د پیسو یوه برخه دوی ته ورشي، که مخ مې دې ولید، له پښو مو راځړوم. که څوک غواړي د بې وزلو له پیسو خپل جیب ډک کړي، دا نه یوازې له ولس سره خیانت دی بلکې له خدای سره هم خیانت دی."