کورونا وېروس: '' بدله شوې بڼه یې د افغانستان ۱۸ ولایتونو ته رسېدلې''

د عامې روغتیا وزارت مرستیال ویاند میرویس علیزي له بي بي سي سره په یوه مرکه کې ، خبرداری ورکړ که خلک روغتیایي لارښوونې په پام کې و نه نیسي د دې ناروغۍ کنټرول به د روغتیا وزارت لپاره ستونځمن شي.

'' د کورونا د نوي ډول چې انګلیسي ډول یې دی، په اتلسو ولایتونو کې یې پېښې مثبتې شوې دي. ډېری پيښې هم په ختیځو ولایتونو کې په ځانګړي ډول ننګرهار کې دي. له ننګرهار وروسته بیا کابل، او هرات، کندهار کې پېښې ډېرې دي او دا هم نه شو ردولای چې کېدای شي په ۳۴ ولایتونو کې د نوي ډول پېښې مثبتې وي. ''

دی وايي د کورونا وېروس بدله شوې بڼه د لومړۍ بڼې پرتله کوم چې د چین له ووهان ولایت څخه خپره شوې لږ خطرناکه ده خو خورا په چټکۍ خپریږي.

د روغتیا وزارت په وینا، د کورونا وېروس ترټولو ډېرې مثبت پېښې په سرحدي ولایتونو کې ثبت شوې دي.

هند ته د افغانانو تګ، راتګ په افغانستان کې د کورونا وېرس هندي بڼې د شتون په اړه هم اندېښنې ډېرې کړې دي، خو د عامې روغتیا وزارت په رسمي ډول په دې اړه څه نه دي ویلي.

دا وزارت وايي، افغانستان کې د کورونا وېرس د هندي او افریقايي ډول پېژندلو لپاره یې هڅې ګړندۍ کړي دي.

https://www.bbc.com/pashto/afghanistan-57212767